من أد إيه واحنا أمّهات؟

سألتنى ابنتى ، وهى دائمة البحث و النبش و"الدعبسه" فى أغوارنفسى: " هوه انتى يا

ماما اتمنيتى تكونى أم وانت صغيّره؟ " ورغم حالة الغيظ التى تتملكنىكلما هطلت  على

أمطار استجواباتها الرعديه ، فإننى "قفشت"  نفسى ابتسم و قدعادتإلى أيام كنت فيها

غضة الأحلام مثلها تملأ نفسى خيالات احتضان طفل و مداعبته والتمتع بلمساته الناعمة

وتقبيل كفه الغضة و ملاحظته وهو ينمو.

وقبل أن تسمع إجابتى السريعة بنعم عاجلَتنى ب "كان عندك كام سنه؟" ففاجأتها وفاجأت

نفسى بالإجابه الأسرع: "ستاشر سنه"

أييييوان!!!

أنا أعلم جيدا متى كان الظهور الأول للأمومةعلى مسرح حياتى !

أذكر أننى كنت أجلس جلسة استرخاء مساء أحد ايام الربيع القمريه ، فى شرفة منزلنا

وإذا بفيض من المشاعرالحانية يغمرنى و أستلذ به دون أن أعلم له سببا. ووجدتنى وقد

تخيلت بين يدى طفلة رضيعة أحتضنها وأغمرها بحنانى و دفء قلبى. ثم تماديت بخيالى

فوجدتنى أتخذ لهااسما وأتصور لها شكلا. كلّمتها وهمست لها بحبّى وأدفات لها

فراشا بجوارى ورحت أهدهدها و أغنى لها.

ومن وقتها و أنا أم!!!

لكنى كنت أما بغيرهموم ولا غسيل مواعين و مكوة هدوم!!!

وتحضرنى فى هذا المقام كلمة السيده فيروز المأثوره:  "يا همّ العُمُر"

أى والله، هم العُمُر!!!! بس نقول إيه بقى ..... ومين غيرنا بقى يا أمهات ح يعدل

المايله؟

أبى فوق الكنبه

كان قاعداً على  الكنبه ، ليل نهار ، عينه لا تغفل ، يقلّب فى القنوات كلّها ، يخشى أن تفوته كلمه أو يهرب من عينيه مشهد وهو يشرب الشاى أو يقوم ليجمعنا معه على السفره ليطمئن أننا ناكل  . ما كان يأكل غير القليل حتى يعود للمتابعة سريعاً . رابضٌ على  الكنبه .  قال وهو كذلك أجمل كلامٍ سمعته منه فى عمرى :" همّه العالم دول عايزين م الدنيا إيه أكتر من كده؟ الواحد يعوز إيه فى سنُّه دى أكتر من إنه يلاقى بيته ولقمته ودواه وعياله بخير حواليه ، إيييييه بقى؟ أكتر من كده يبقى بَطَر، وسايبين شعبهم كده ، ح يروحوا من حساب ربنا فين؟ لييييه كده؟ ح يستحملوها إزّاى دى؟ لسّه فيهم نَفَس؟ مخلِّدين يعنى؟"

ثمّ ، و هو يتابع تساقط الشهداء ويرى تلاحم الناس فى الميدان: "العيال دول رجّاله واللهِ بجد ، لأ ما يسيبوش الميدان ، لازم يجيبولها آخر ، خلاص ، المشوار اللى بدأوه لازم يكمّلوه هانت ، واللهِ هانت ، يصبروا بس شويّه وربنا ح ينصرهم إن شاء الله. همّه كده آخر تمام."

وحين كانت أمّى بطيبتها تقول "خلاص ماهو الراجل قال ح يمشى مش ح يورِّث ابنه آهو عايزين إيه تانى؟ يروّحوا و يفضّوها سيره بقى"

كان زئيره يعلو : "اسكتى انتى مش عارفه حاجه، دول لو روَّحوا ح يفرموهم ، دول اتسعروا ومالهمش أمان ، حد يعمل كده؟ يقتّل فى شعبه كده؟ العيال دول فاهمين أكتر مننا وعارفين بيعملوا إيه ، ده مستقبلهم وحياتهم ، إحنا عيشنا حياتنا خلاص ."

 كان ينظر إلى أولادى بحنانٍ طاغٍ ويقول: " انا عايز إطّمّن علي دول ، والله كنت قلقان ح يعيشوا أزّاى ، زمانهم صعب قوى"

ولن أنسى ما حييت كيف وقف فى الشرفة يحيِّى جماهير المتظاهرين ويلَوِّح بيديه لهم باكياً اعتلال صحته الذى منعه أن يسافر إلى التحرير ليكون فى قلب الأحداث. كما لن أنسى ولن ينسى أولادى موقفه حين لاحظنا أنه لا يأكل كما يجب و علمنا أن السبب ألمُ فى أسنانه. فقمنا بالحجز له لدى طبيب الأسنان،"عايزين نطمئن عليك يا بابا " ففوجئنا به يقوم من مكانه غاضباً ويقول لنا قولته التى هزَّت مشاعرنا جميعاً: "سنان إيه و بتاع إيه اللى نطّمّن عليها ، مش لمّا نطّمّن على بلدنا الأول؟"

كنا نختزنه فى الذاكرة لحظةٌ بلحظه ، كلمةٌ بكلمه ، نظرةٌ بنظره . وكأننا نعلم .....

 شاء الله لى و زوجى وأولادى أن نعود من المظاهرات قبل الإعلان عن التنحّى بربع ساعة فقط ربّما لنشاركه الفرحة ويرانا وقد عُدنا و كأننا للتو عائدين من عُرس أو رحلةٍ خلويه. رأيتُ وجهه كيف استقبل الخبر بفرحةٍ طاغيه لكنها فرحة من كان واثقاً تماماً بأن ذلك لا بد أن يحدث.

عاش فرحته شهران لا ينقصان يوماً ، قبل أن يرحل إلى ربِّه و يترك لنا الحسرة والحيرة والتخبُّط والألم. أحمد الله أن كان آخر عهده بالدنيا ، قبل رحيله بستة أيّام فقط الاستفتاء على الدستور. ذهب إلى هناك محمّلاً بالحلوى يفرِّقها على الناخبين والجنود على حد سواء. وجاء يزورنى وفرحته تتقافز فى عينيه كالطفل فى العيد ويقول لى: " قلت لأ طبعاً ، همّه لسّه ح يضحكوا علينا؟ أنا مبسوط قوى واللهِ ، سبعين سنه ودى أوّل مرّه أنتخب واقول رأيى."  ثم أسند رأسه للوراء و قال من عمق أعماقه :" الحمد لله " وأشار إلى أولادى وهو يقول "عشان الولاد دول يطلعوا فى دنيا أحلى من اللى عشناها ، الحمد لله ، أنا كنت خايف عليهم أوى "

لم يعلّمنى أبى السياسه ، لكنه علّمنى معنى الوطن

لم يعلّمنى كيف أراوغ أو أتحايل أو أهادن ، وإنما علّمنى معنى العزّة والحريه ، وأورثنى الكرامة والإباء

علّم أولادى حب هذا الوطن ، وعلّمنا جميعا أن نفتح عيوننا وعقولنا وألا نسمح لكائنٍ من كان أن يستغل حبُّنا للوطن فيُسَخِّرنا لخدمة أغراضه هو ، "مش ح يضحكوا علينا خلاص"

هذا ما سأذكره وأنا أقف غداً فى الطابور ... سأذكرالله ، وأذكر مصر الغاليه و أذكر أبى الذى ... كان مصريّاً حتى النخاع :

كان رجلاً بحق الرجوله ، يضِجُّ الهواء حوله بهالةٍ من المهابة والجلال

كان بشوشاً ، شديد الطيبة ووافر الشهامة والكرم

وكان دفّاق الحنان و المودّه ...

 و ... كان أيضاً .......................... رابضٌ فوق الكنبه !!

ويا رييييتنى ما فهمت!

طلعت فاهمه للأسف !!! والله ما كنت عايزه افهم اللى انا فهمته ده خااااااالص !!!! أصلها  مصيبه سوده و حطِّت على دماغى !!!!! ليه؟ عشان  أنا بقى شغلانتى أصلاً إنّى أفهِّم الناس ... تصدقوا!!! آه والله زى ما بقولّلكوا كده .... أنا مفهِّماتيّه مُحترفه !!!!!! أصلى خايفه كمان أقوللّكوا حقيقة مهنتى اللى كلكم موجوعين بيها ( اللى هيّه المفروض فى زمانٍ آخر تكون أشرف مهنه) أحسن تقفلوا المدوّنه و تبلّغوا منّى فرار للأبد !!!!!

المهم بقى طَلَعت فاهمه إيه؟

شكلها كده الحكايه ملعوبه صح ، قالوله تمام يا فندم سيب لنا الطلعه دى، سيبك من العادلى ده اللى لعبها بغشوميّه و خربها و قَعَد على تلّها، إحنا جنود مصر الحُرّه و الّلى بقالنا سنين مركونين على دكّة الاحتياطى. إستوريّح بس جنابك شويّه ف شرم على ما نلمّها و نطمّنك.

قوم إيه الراجل الكبير صدّقهم وقام واخد مراته وعياله و رااايح على شرم يستنىّ البواسل يتصرّفوا ، ما هو العيال برضه أحرجوهم وطّلعولهم ضباط صُغيّرين يكلّموهم على الفضائيات و ح يبقى شكلهم مسخره.كان لازم يلمّوها ويكشكشوها قبل ما تبهوأ وتسيح!!!

بس يا حرام الوحوش المدرّبه اللى كان العادلى بيربّيها من زمان ع الغالى واللى اتصرف عليها دم قلوب كل المصرىىن وبقالها ممسوكه فى جحورها مدّه كبيره  خلااااااص استوت واتسعرت وكان لازم تهبش بقى و تلاقى فرايس (جمع فريسه، ماشى؟ ) تنهشها قبل ما تنقلب على اسيادها . آهو جه أوانها بقى!!!!!!!!! مش عايزين انتخابات حره نزيهه يا حلوين؟   آوى آوى آوى ، بس كده؟  عينينا والله إنتوا بس تأشّروا ، انزلولنا انتوا الميدان واحنا جاهزين ومستنّيينكم والله على نار عايزين بس نوجّب معاكوا !!!!

هيه وبعدين؟ خدتوا بالكو من السيناريو؟ مقتبس من رواية إيه؟ ومين اللى إدّالهم تصريح بإعادة الإنتاج؟ والتوزيع والذى منّه؟ مش بذمّتكم سيما ؟ كوميديا من الطراز اللى عُمر اسماعيل ياسين ما حِلِم بيه ولا يوصلّه خيال ، سيما أمريكانى إيه يا عم؟ البلدى يوْكَل !!!

لأ بصراحه سبكوها علينا !!!! الواحد لازم يقول الحق ولو على رقبته! أوسكار أوسكار يعنى!

أنا عارفه إنّى ما جبتش تايهه ، ما فيش حد فى البلد دى ما بيفهمش . كلّنا فاهمين و الفيلم متعاد خمسميت مرّه ع القناة الأولى فى السهره واليوم المفتوح كمان !!!!

 بس اسمحولى أحرجكم وأسألكم وألحّ أوى عليكم واستحملوا غلاستى وعباطتى اللى ما ليها واللهِ زىّ : همّه الوحوش واللا البواسل دول مش مصريين زيِّنا؟ مصريين مننّا؟ ولاد عمامنا واللا خيلاننا واللا حتى جيراننا؟ هيه محتاجه فكاكه واللا فتاكه عشان نفهم إن إحنا نفسنا وحشين؟ إن جزء كبيييييييييييييييييييييييييييييييييييييييييييييييييير جدا من الجسد المصرى مصاب بالتسمّم فى الشخصيّه وغرغرينا فى النفسيه ؟ وجلطه مكلكعه أوى فى شريان الضمير؟ لأ وإعوجاج حاد جدًّا جدًّا فى العمود الفقري السلوكى؟

معلش استحملوها منّى دى وانا ح اوشوشكوا بيها على استحياء (عشان خاطركم بس وحفاظاً على رقَّة مشاعركم ورهااافة أحاسيسكم) أصل أنا مؤدّبه أوى وأنتوكه!!!!

واللا أقولّلكوا : أنا عايزه أصرّخ بيها ف وشوشكم وأجرّس نفسى وأجرّسكم يمكن نفوق كلّنا علشان نلحق نعمل حاجه بقى (آسفه إذا كان صوتى عالى شويّه واللا بتكلّم بانفعال)

الحقيقه المُرّه يا ناس هى إنّنا شعب مش متربّى !!!!        لأ لأ لأ لأ مش بشتم والله !

أنا شايفه إن إحنا شعب ليس له أى نسق تربوي يمنحه قاعدة قيَم ثابته وسلوكيّات تقليديه ومُلزِمه إجتماعيًّا تتناقلها الأجيال ولا تتنازل عنها أو تسعى إلى تغييرها مطلقا بل وتتوارثها الأجيال بفخر وكأنّها مقتنيات قوميّه أو آثار نفيسه تجتذب السيّاح . طب ح اسهِّلهالكم شويه:

عارفين اليابانيين؟ دينهم إيه؟ أديان كتيره ومعظمهم لا يدينون بأى دين سماوى أصلاً.   طب همّه كده ليه؟ بيقدّسوا الجمال والنظافه ويكادوا يعبدوا العمل ليه؟ مش بيتخانقوا فى الشوارع ليه؟ ولا فى القطارات ولا ف أىّها حاجه ، ليه؟ الدنيا عندهم زحمه برضه وعندهم مشاكل اقتصاديه أو اختلافات سياسيه أيْنعم لكن ما عندهمش أولاد شوارع ولاحد بيكتب ع الحيطان للذكرة الخالده(آه بيكتبوها كده!) . شفتوا الإنحناء والأدب؟ حد يقدر يقول ما عندهمش كرامه؟ واللا حد عندهم ما بيحترمش الدور فى الطوابير؟ مالها الطوابير؟ ماهى طريقه محترمه فى العالم كلّه لتحقيق العداله بنظام ، وف كل دول العالم المتقدمه.

لمّا احنا فخورين كده بنفسنا قوى وثُرنا عشان نرفع راسنا لفوق ، مش نرفعها واحنا بنستاهل ؟ مش نتربّى بقى ونربِّى ولادنا عشان نعرف نرفع راسنا فى أنهى اتجاه؟

بالذمّه ما حدّش زيّى مكسوف على دينه إن اليابانى الكافر مهذب أكتر منّه ؟ وبيشتغل بإتقان أكتر منّه؟ وإن بيوتهم أنضف من بيوتنا وألفاظهم أحسن من ألفاظنا؟ وإن ولادهم و شبابهم أكثر جدّيه والتزام بقيَم العمل والإنتاج أكتر من ولادناوشبابنا؟  تفتكروا ممكن بعد الثوره نقدر نعمل حياتنا زى ما همّه عملوا حياتهم بعد الحرب العالميه الثانيه؟ تيجوا نحاول؟ لأ لأ لأ لأ  تيجوا نحط نيّه لله إننا نموت واحنا بنحاول؟ وإننا لازم وعهد علينا نتربّى ونربّى ولادنا وتبقى إعادة تربية الشعب ده هيّه شغلنا الشاغل وهدفنا من الحياه بجد بجد؟

أنا عشان كده قلت أكتب وعشان كده أنا عايشه. التربيه هى مهنتى التى أشرف بها، هى هدفى الذى من أجله أحيا. نفسى ييجى اليوم اللى نرجع ينضرب بينا المثل فى كل شئ جميل وراقى وفى كل المجالات : خُلُق و ذوق ، علم وعمل ، جمال ونظافه ، جديه والتزام تبجيل واحترام لكل ما هو حقا ذو قيمه انسانيّه رفيعه

نفسى اليابانى ما يبقاش أحسن منّنا ولّا ولاده يبقوا أعقل وأسعد وأكثر تهذيباًمن ولادنا ولا بلاده وصناعة بلاده تبقى أعلى وأكثر تقدُّماًمن بلادنا وصناعة بلادنا

إزَّاى؟ نعملها إزَّاى؟

سوا ، لازم نعملها سوا ، سوا يا ناس كلنا ، فى بيوتنا ومدارسنا وشوارعنا وكل مكان نكون فيه من غير ما نخاف أو نتكسف ، وهيه فيه كسفه واللا وكسه أكبر من كده؟

نصبر ونصطبر حتى نلقى الله ونكون فعلا ربّينا وطلّعنا للدنيا خير أجناد الأرض

نفهمها صح بقى!!!!!!!  

مش فاهمه ومش ح افهم!!

ليس عيبا أن أقول بأننى لا أفهم ، و إنما العيب أن أفتى و أملأ الدنيا كلاماً فيما ليس لى به علم . على الأقل هذا ما تعلمته و رُبيت عليه. وفى وقت كالذى نعيشه الآن تحديدا أجد أن ما أقوله  يريد أن يقوله أناس كثيرون ، ولكن على استحياء وبصوت خفيض، وفى أكثر الأحوال يقولونه تلميحاً لا تصريحاً . ليه ؟ لأنها و ببساطه هوجة كلام كالتى تحدث عندما يكمَّم شخص ثرثار لفترةٍ طويله وما أن تُنزع عنه الكمامة حتى ينطلق يثرثرويثرثر فى كل شئ وأى شئ دون ترابط أو وعى بما يقول . أليس ذلك ما يحدث الآن؟

 والكل الآن يخاف من الاعتراف بالجهل لئلا  يُواجه بالاستنكار الشديد :  " إيه ؟ هيّة مش بلدك؟

مش عارف يعنى الثوره قامت ليه ؟ إنت مش حاسس بالدنيا؟   لازم يكون لك صوت و مؤثر كمان !!

لازم تعبَّرعن رأيك !!  ده حقَّك و حق بلدك عليك!!!   أمَّال ح تعلِّم ولادك إيه؟"

أيييييوه ، هوّه ده بقى مربط الفرس!!!

ح نعلّم أولادنا إيه ؟ الكلام ؟ الكل الآن يتكلّم ، وركِّزوا على يتكلَّم هذه ، فى صوتٍ واحدٍ وفى موضوعٍ واحدٍ و إن اختلفت الأساليب . أتحدى من يقول أن المضمون يختلف وإن اختلفت الألسنة. كل من هب و دب كبُرَ أم صًغُر  عارف الصح إيه ،  وإيه اللّى لازم نعمله بالضبط . لقد سمعت الجميع على اختلاف مشاربهم واتجاهاتهم الفكريه وأقسم بالله أننى قد أُعجَبت بهم جميعاً ، آىْ واللهِ ، لأننى لا أفهم كثيرا فى السِّت سياسه . ما شاء الله كلُّهم ناس بيقولوا كلام يوْزن الدماغ بجد.  كلهم واعيين وفاهمين و مدوَّخين مذيعين ومذيعات التوك شو مش عارفين يحرجوا أىّ واحد منهم أو يوقّعوه في الكلام . أنّما ما يحيّرنى تماماً هو : كيف ومتى سينفِّذون خططهم الباهره و تنهض بلادنا بقى؟  من أين سيبداُ أىّ واحد منهم ؟ الصحه أم التعليم؟ المنهج أم المُعلّم؟ المرتَّبات أم العشوائيات؟ البيضه واللا الفرخه؟

ولقد دُختُ وغُلُب غُلْبى حين وجدت أنَه قد حان وقت الاختيار : أختار مين بقى ؟ حادى بادى كرنب زبادى سيدى محمد البُغدادى شاله و حطُّه و كلُّه................على مين؟ الأخوات الحلوين واللا الناس المحترمين واللا الكتّاب المثقَّفين واللا المصريين المفتَّحين واللا القوادم المخضرمين؟ طب الجداد في اللون واللا اللى من زمان متلوِّنين؟ والنّاس الغلبانين واللا العلماء العالِمين؟

والأوقع من ذلك أننى أصبحتُ أنا و زوجى مطالبيْن بالإجابه على أسئلة أولادنا : ح تنتخبوا مين؟ طيب هوه أنتوا متفقين على حد؟ وفيها إيه لمّا انتى و بابا تختاروا عكس بعض؟ هوه انتوا مش نزِّلتونا المظاهرات عشان نتعلّم الحريّه  وندافع عن حقوقنا؟ و يا سلام بقى لو الواحد قال يريَّح نفسه و يسكِّتهم بأىّ أجابه و السلام......خدوا عندكوا بقى: ليه يا ماما ؟ مش ده عايز يطبَّق الإسلام ؟ طب و همَّه دول غلط ليه ؟ مش ده راجل أخد جايزة نوبل؟ وده باين عليه ح يقف لإسرائيل وقفه جامده !! بس ده يا ماما كان وزير معاهم زمان كده ينفع؟ وهمَّه ليه المسيحيين زعلانين مننا ؟ ما هى طنط جانيت جارتنا طيِّبه قوى واحنا بنحبَّها ولسه مكلّمانا فى التليفون تهنّينا بالعيد.....................آآآآآآآآه  يا دماغى !!!! الرحمة ياااااااااارب!!

ماذا أقول و أىّ شئ أقول بعد كل ما قيل ؟؟؟ ماذا سنقول لأولادنا؟ كيف سنرد علي أسئلتهم الشديده الذكاء و المكر ؟ ماذا سنترك لهم؟ أية قيَم سنغرسها فى تكوينهم؟ أليس ذلك همُّ كبير؟ أليست تلك تَبِعةُ ومسئوليّه أمام الخالق عزّ وجلّ؟

أقول لكم بجد؟ لقد قلت لأولادى أن الحريّة والكرامه هما أغلى ما وهبنا الله بعد الإيمان به وهما الأمانة التى حملها الإنسان دونما أحد من الخلق أجمعين. وأنّه ليس لأحد أن يسلبهما منّا كائنا من كان أو قائلا ما قال.

طب احنا بقى مين؟

نحن الذين نرجو أن نكون للفتن معتزلين وبالعمل الصالح منشغلين وعلى تنشئة أولادنا منكبّين ولأفواهنا كاتمين وفى عفو الله وستره طامعين نحن يا خلق هووووه  حزب الناس اللى مش فاهمين !!!